இதுதான் ஸ்மார்ட் சிட்டியா? சாலையில் ஆறாக ஓடும் சாக்கடை கழிவு நீர்.!.

கோவை: ஸ்மார்ட் சிட்டி கோவை மாநகரின் முக்கியப் பகுதியான சாய்பாபா காலனியில், பாதாள சாக்கடையில் ஏற்பட்ட அடைப்பால் கழிவுநீர் சாலையில் ஆறாகப் பெருக்கெடுத்து ஓடுவதால் பொதுமக்கள் கடும் அவதிக்குள்ளாகி வருகின்றனர்.

சாய்பாபா காலனி காய்கறி மார்க்கெட் பகுதியில் அடிக்கடி ஏற்படும் பாதாள சாக்கடை அடைப்பு, தற்போது அப்பகுதி மக்களுக்கும் வியாபாரிகளுக்கும் பெரும் சுகாதாரப் பிரச்சினையாக மாறியுள்ளது. பாதாள சாக்கடை மூடிகள் வழியாக வெளியேறும் துர்நாற்றம் வீசும் கழிவுநீர், சாலையில் பெருக்கெடுத்து ஓடுவதுடன், சாய்பாபா காலனி காவல் நிலையத்தின் நுழைவுவாயில் பகுதியையும் சூழ்ந்துள்ளது.

இதனால், அப்பகுதியில் தினமும் வந்து செல்லும் ஆயிரக்கணக்கான பொதுமக்கள், காய்கறி வியாபாரிகள் மற்றும் பாதுகாப்புப் பணியில் ஈடுபடும் காவல்துறையினர் எனப் பல்வேறு தரப்பினரும் பாதிக்கப்பட்டுள்ளனர். சாலையில் தேங்கியும் ஓடியும் கொண்டிருக்கும் கழிவுநீரைக் கடந்து செல்ல வேண்டிய நிலை ஏற்பட்டுள்ளதால், பொதுமக்கள் மூக்கைப் பொத்திக்கொண்டு செல்லும் அவல நிலை நிலவுகிறது. கடும் துர்நாற்றத்தால் அப்பகுதியில் இயல்பான நடமாட்டமும் பாதிக்கப்பட்டுள்ளது.

ஏற்கெனவே, இந்தப் பகுதியில் பாதாள சாக்கடை அடைப்பு அடிக்கடி ஏற்படுவது தொடர்கதையாகி வருவதாகக் கூறும் அப்பகுதி வியாபாரிகள், இதற்குத் நிரந்தரத் தீர்வு காணப்படாமல் இருப்பதாகக் குற்றம் சாட்டுகின்றனர். மாநகராட்சி நிர்வாகம் உடனடியாகத் தலையிட்டு, அடைப்புகளை அகற்றி, கழிவுநீர் சாலையில் வெளியேறுவதைத் தடுக்க வேண்டும் என்றும் அவர்கள் வலியுறுத்துகின்றனர்.

மேலும், சாலையில் தேங்கும் கழிவுநீரால் கொசுக்கள் உற்பத்தியாவதுடன், தொற்றுநோய்கள் பரவும் அபாயமும் இருப்பதாகப் பொதுமக்கள் அச்சம் தெரிவிக்கின்றனர். குறிப்பாக, காய்கறி மார்க்கெட் அமைந்துள்ள பகுதியில் நிலவும் இந்தச் சுகாதாரச் சீர்கேடு, வியாபாரிகளுக்கும் சந்தைக்கு வரும் பொதுமக்களுக்கும் பாதிப்பை ஏற்படுத்தும் சூழலை உருவாக்கியுள்ளது.

எனவே, சாய்பாபா காலனி காய்கறி மார்க்கெட் மற்றும் காவல் நிலையம் அருகே ஏற்பட்டுள்ள பாதாள சாக்கடை அடைப்பை மாநகராட்சி அதிகாரிகள் உடனடியாகச் சரிசெய்து, சாலையில் ஓடும் கழிவுநீரை அகற்றுவதுடன், இதுபோன்ற பிரச்சினைகள் மீண்டும் ஏற்படாத வகையில் நிரந்தரத் தீர்வு காண வேண்டும் என்பதே அப்பகுதி மக்களின் முக்கியக் கோரிக்கையாக உள்ளது.