குட்டீஸ் முதல் பிளஸ் 2 வரை… கலைத்திறமையால் அசத்திய சின்மயா வித்யாலயா மாணவர்கள்!

கோவை வடவள்ளி சின்மயா வித்யாலயா மெட்ரிகுலேஷன் மேல்நிலைப் பள்ளியின் ஆண்டு விழாவான ‘வைபவம்’,  மிகுந்த உற்சாகத்துடனும் கோலாகலத்துடனும் நடைபெற்றது. இவ்விழாவில் மழலையர் வகுப்பு முதல் 12-ம் வகுப்பு வரை பயிலும் மாணவ, மாணவிகள் பங்கேற்று, தங்களது கலைத் திறமைகளையும் படைப்பாற்றலையும் வெளிப்படுத்தினர்.

விழாவில் பொருளாதார நிபுணர் டாக்டர் கே. அண்ணாமலை சிறப்பு விருந்தினராகக் கலந்துகொண்டு சிறப்பித்தார்.பள்ளியின் முதல்வர் உமாதேவி துரைசாமி மற்றும் தாளாளர் நிர்மல் குமார் ஜெயின் ஆகியோர் முன்னிலை வகித்தனர்.

சின்மயா மிஷனின் 75 ஆண்டுகால ஆன்மிக மற்றும் சேவைப் பயணத்தை எடுத்துரைக்கும் காணொளியுடன் விழா தொடங்கியது. தொடர்ந்து, பள்ளி முதல்வர் திருமதி உமாதேவி துரைசாமி ஆண்டறிக்கையைச் சமர்ப்பித்து, பள்ளியின் கல்விசார் சாதனைகள், மாணவர்களின் திறன் மேம்பாட்டு நடவடிக்கைகள் மற்றும் பல்வேறு துறைகளில் மாணவர்கள் பெற்றுள்ள முன்னேற்றங்கள் குறித்து எடுத்துரைத்தார்.

இதையடுத்து, சிறப்பு விருந்தினர் டாக்டர் கே. அண்ணாமலை உரையாற்றினார். மாணவர்கள் கல்வியில் சிறந்து விளங்குவதுடன், தனித்திறன்களையும் வளர்த்துக்கொண்டு, ஒழுக்கம், தன்னம்பிக்கை மற்றும் சமூகப் பொறுப்புணர்வுடன் முன்னேற வேண்டியதன் அவசியத்தை வலியுறுத்தும் வகையில் அவரது உரை அமைந்தது.

விழாவின் முக்கிய நிகழ்வாக, மழலையர் வகுப்பு முதல் 12-ம் வகுப்பு வரையிலான மாணவ, மாணவிகள் பங்கேற்ற பல்வேறு கலை நிகழ்ச்சிகள் நடைபெற்றன. நடனம், இசை உள்ளிட்ட கலை நிகழ்ச்சிகள் மூலம் மாணவர்கள் தங்களது திறமைகளை அழகாக வெளிப்படுத்தினர். மாணவர்களின் ஒருங்கிணைப்பு, படைப்பாற்றல் மற்றும் மேடைத் திறன் பார்வையாளர்களைப் பெரிதும் கவர்ந்தன.

மாணவர்களின் கல்வி வளர்ச்சியுடன் கலை, கலாசாரம் மற்றும் தனித்திறன்களுக்கும் முக்கியத்துவம் அளிக்கும் பள்ளியின் அணுகுமுறையைப் பறைசாற்றும் வகையில் ஆண்டு விழா அமைந்தது. ஒற்றுமை, படைப்பாற்றல் மற்றும் சாதனை உணர்வை முன்னிறுத்திய இந்த ‘வைபவம்’ ஆண்டு விழா, மாணவர்கள், ஆசிரியர்கள் மற்றும் பெற்றோர்களுக்கு மகிழ்ச்சியையும் பெருமிதத்தையும் அளித்ததுடன், அனைவரது மனதிலும் நீங்காத இனிய நினைவுகளைப் பதித்துச் சென்றது.