"யாத்ரி சேவா அபியன் 2026"

கோவை இந்திய விமான நிலையங்கள் ஆணையத்தின் (Airports Authority of India – AAI) கீழ் இயங்கும் கோயம்புத்தூர் சர்வதேச விமான நிலையத்தில், பயணிகளின் வசதிகளை மேம்படுத்துதல், சேவைகளின் தரத்தை உயர்த்துதல் மற்றும் பாதுகாப்பான, சீரான, சிரமமற்ற பயண அனுபவத்தை உறுதி செய்தல் ஆகிய நோக்கங்களுடன், 17 செப்டம்பர் 2026 முதல் 10 அக்டோபர் 2026 வரை யாத்ரி சேவா அபியான் 2026 கடைப்பிடிக்கப்பட்டது.

இவ்விழாவின் ஒரு பகுதியாக, விமான நிலைய முனையத்தில் உள்ள வசதிகளின் தூய்மை, இருக்கை வசதிகள், மின்னணு சாதனங்களுக்கான சார்ஜிங் வசதிகள், வழிகாட்டிப் பலகைகள், குடிநீர் வசதி, கழிப்பறைகள், சாமான்கள் கையாளும் சேவைகள், டிஜிட்டல் வசதிகள் மற்றும் உணவு, பான விற்பனை நிலையங்கள் ஆகியவை குறித்து வழக்கமான ஆய்வுகள் மேற்கொள்ளப்பட்டன. சேவைகளில் உள்ள குறைபாடுகளைக் கண்டறிந்து, தொடர்ச்சியான மேம்பாடுகளை மேற்கொள்ளும் நோக்கில் பயணிகளின் கருத்துகளும் தீவிரமாகக் கேட்டறியப்பட்டன.

பயணிகளின் குறைகள் மற்றும் புகார்களுக்குத் தீர்வு காணும் நடைமுறையை வலுப்படுத்தும் வகையில், விமானத் தகவல் காட்சித் திரைகளில் (Flight Information Display Systems – FIDS) தொடர்புடைய தொடர்பு விவரங்கள் காட்சிப்படுத்தப்பட்டன. மேலும், QR குறியீடு வாயிலான கருத்துப் பதிவு வசதிகள் ஏற்படுத்தப்பட்டு, பயணிகள் தங்களது கருத்துகளையும் பரிந்துரைகளையும் எளிதாகப் பகிர வழிவகை செய்யப்பட்டது. பயணிகள் சோதனை நடைமுறைகள் மற்றும் விமானத்தில் எடுத்துச் செல்லத் தடைசெய்யப்பட்ட பொருட்கள் குறித்த விழிப்புணர்வு நடவடிக்கைகளும் மேற்கொள்ளப்பட்டு, பயணிகளின் சோதனை மற்றும் அனுமதி நடைமுறைகள் சீராக நடைபெற ஏற்பாடுகள் செய்யப்பட்டன.

இவ்விழாவின் ஒரு பகுதியாக, 27.09.2026 அன்று கோயம்புத்தூர் சர்வதேச விமான நிலையத்தில் உலக சுற்றுலா தினம் கொண்டாடப்பட்டது. இதனை முன்னிட்டு, பயணிகளுக்குப் பாரம்பரிய முறைப்படி வரவேற்பு அளிக்கப்பட்டதுடன், கலை மற்றும் கலாசார நிகழ்ச்சிகளும் நடத்தப்பட்டன. இந்நிகழ்ச்சிகள் கோயம்புத்தூர் மற்றும் அதன் சுற்றுப்புறப் பகுதிகளின் செழுமையான கலாசாரப் பாரம்பரியத்தை வெளிப்படுத்தியதுடன், “அதிதி தேவோ பவ” (விருந்தினரே இறைவன்) என்ற இந்திய விருந்தோம்பல் பண்பாட்டின் சிறப்பையும் எடுத்துரைத்தன.

பயணிகளின் நடமாட்டம், வாகன நிறுத்துமிட வசதிகள் மற்றும் போக்குவரத்து மேலாண்மை ஆகியவை ஆய்வு செய்யப்பட்டு, செயல்பாடுகளில் ஏற்படக்கூடிய இடையூறுகளைக் கண்டறிந்து அவற்றைச் சரிசெய்ய நடவடிக்கைகள் மேற்கொள்ளப்பட்டன. விமான நிலைய வளாகத்தைத் தூய்மையாகவும் சுகாதாரமாகவும் பராமரிப்பதற்காகத் தூய்மைப் பணிகளும் மேற்கொள்ளப்பட்டன. மேலும், அவசரகாலத் தயார்நிலையை மேம்படுத்துதல், சம்பந்தப்பட்ட அனைத்துத் தரப்பினரிடையே ஒருங்கிணைந்த செயல்பாட்டை வலுப்படுத்துதல் மற்றும் பயணிகளின் பாதுகாப்பை உறுதி செய்தல் ஆகிய நோக்கங்களுடன் கட்டிட வெளியேற்ற ஒத்திகையும் நடத்தப்பட்டது.

இவ்விழ விமான நிலையப் பணியாளர்கள், விமான நிறுவனங்கள், மத்திய தொழில்துறை பாதுகாப்புப் படை (CISF) மற்றும் பிற தொடர்புடைய தரப்பினரின் ஒருங்கிணைந்த ஒத்துழைப்புடன் செயல்படுத்தப்பட்டது. இம்முயற்சிகள், பயணிகளை மையமாகக் கொண்ட சேவை வழங்கல், தொடர்ச்சியான சேவை மேம்பாடு மற்றும் பயணிகளுக்கு அன்பான, வரவேற்புமிக்க பயணச் சூழலை உருவாக்குதல் ஆகியவற்றில் கோயம்புத்தூர் சர்வதேச விமான நிலையம் கொண்டுள்ள உறுதிப்பாட்டை மீண்டும் வலியுறுத்தின.